દામોદર દુઃખડાં કાપો રે

દામોદર દુઃખડાં કાપો રે, બળવંતા બેલી !

નંદલાલ નિજાનંદ આપે રે, બળવંતા બેલી ! દામોદર૦

વહાલાજી, હું તો પળ પળનો અપરાધી;

ભરેલે આધિ-વ્યાધિ રે, બળવંતા બેલી ! દામોદર૦

વહાલાજી, હું તો તમારા બળથી ગાજું;

જાણો છો, કહું શું ઝાઝું રે, બળવંતા બેલી? દામોદર૦

વહાલાજી, જેવો તેવો છું તો યે તમારો;

આધાર અવર નહિ મારો રે, બળવંતા બેલી ! દામોદર૦

વહાલાજી, મારું જોર નથી, જો તરછડો;

શું રૂઠી કરે મંકેડો રે, બળવંતા બેલી? દામોદર૦

વહાલાજી, શ્રીમુખ પોતાનો કહો છો, માટે લાડું !

બીજું બળ ક્યાંથી કાઢું રે, બળવંતા બેલી? દામોદર૦

દયાના પ્રીતમ ! પાણિ ગ્રહ્યો છે, તે નિભાવો !

મારે દાસપણાનો દાવો રે, બળવંતા બેલી. દામોદર૦

Damodar dukhda kapo re