ઘડી એક ગાની રે

ઘડી એક ગાની રે

ઘડી એક ગાની રે, ઘેલા પ્રાણી રામને રે,

આવડો શું હીડે મોડા મોડ;

દીઠાનો દઝાડો રે, તારો મનખો જાય છે રે,

નહિ તારો ત્રણ ભુવનમાં ઠોર. ઘડી એક ગાની રે૦

પથ્થર બાંધી રે, શું પાણીમાં પડ્યો રે?

વહેતો જાશે રે તું દૂર;

દુઃખડું લગાડી રે, કહું તારા કામનું રે,

જાણી જોઈને કૂખમાં શું નાખે ધૂળ. ઘડી એક ગાની રે૦

ચોરાશીની વાટે રે, ચાલ્યો ઢોલ વાજતે રે,

કોણ કરે તારી બૂમ ને વહાર?

એવું દુઃખ જાણી રે, ‘થોભણ’ થોભજો રે,

ઊતરીને જાવું પેલી પાર. ઘડી એક ગાની રે૦

Ghadi ek gani re