લાગે પ્રેમ પ્રીતનો રંગ

લાગે પ્રેમ પ્રીતનો રંગ, ટાળ્યો તે તો નહિ ટળે રે,

દ્વેષી દુર્જન લોક, રીસે તે તો બળે રે.

મારા શિર પર છબીલાની છાપ, ભવોભવ રહેજો રે;

હરિના દાસના દાસનો દાસ, મને નિત્ય કહેજો રે.

હરિ સંત સેવતાં મેણું, બેસશે તો સહીશું રે;

હરિ સદ્દગુરુ મળે એક, તેના થઈ રહીશું રે.

ભજતા જાયે ભલે લાજ, તો હવડાં જાજો રે;

ગુરુ ગમે ‘ગેમલજી’ કહે, ગુણ ગોવિંદના ગાજો રે.

હરિ સંત સ્વરૂપી ઝાઝ, તેમાં જે કોઈ બેસે રે;

તેને લઈને ઉતારે ભવપાર, ‘ગેમલજી’ કહે છે રે.

Lage prem prtino rang