રેખ્તા
હિન્દવી
સૂફીનામા
રાજસ્થાની
શાને?
shane?
લલિત જી ભટ્ટ
લલિત જી ભટ્ટ
મને કહોને ઓ કોઈ તમે, શાને આ રંગ જુદા જુદા?
વૃક્ષોનાં ફળફૂલને હૈયે હીંચોળીને
હોંશેથી હેત કરી લેતા,
કો’ દિન તો સૂસવતા આવી થથરાવતા
સર્વેને દૂર ફૂંકી દેતા.
પવનદેવ! શાને આ રંગ જુદા જુદા?
સાગરનાં નીર! તમે ધીમે સરકતી
હોડીને હાસ્ય કરી જોતાં,
ઘૂઘવતાં આવીને કંપાવી કો વાર
એને કાં પાય નીચે લેતાં?
સાગરનીર! શાને આ રંગ જુદા જુદા?
ધરતીને ભીંજવવા તમે મેહુલિયા!
સાથે જળધાર લઈ આવો,
તરસે રિબાતી ધરતીનો કોઈ વાર
સાદ ના કેમ યાદ લાવો?
મેહુલિયા! શાને આ રંગ જુદા જુદા?
સ્રોત
- પુસ્તક : ગીતરાણી (પૃષ્ઠ ક્રમાંક 24)
- સંપાદક : ભાનુભાઈ પંડ્યા
- પ્રકાશક : ઘરશાળા પ્રકાશનમંદિર
- વર્ષ : 1945