search search
લૉગ-ઇન

મારા ગામને મારી નદીએ...!

mara gamne mari nadiye !

રમેશ જાની રમેશ જાની
મારા ગામને મારી નદીએ...!
રમેશ જાની

સાંભળ્યું છે

મારા ગામને

મારી નદી

ઘુમરાતાં ચકરાતાં અકરાંતિયાં વમળોમાં

અકળાવી અમળાવી મમળાવી

પોતાની સાથે તાણી ગઈ છે :

પેલી ગાંડી કંકુડીની જેમ –

પોતાના

હસતા રમતા ગેલતા

નાનકડા શિશુને

ફેરફૂંદડી ફેરવતાં ઘુમાવતાં ફેરવતાં

ગામની નિંદરતી નિઃસહાય શેરીઓમાં

છુટ્ટાં જટીઆંએ ચીખતી દોડતી ઘૂમતી કૂદતી

ફીણ ફીણ થતી હાકોટતી મધરાતે

અંધકારમાં ફેલાઈ ને એ

પ્રેત બની ગઈ હતી તેમ!

સાંભળ્યું છે.....

સારું છે, માત્ર સાંભળ્યું જ છે!

.....ત્યાં હજી

જવાય એવું નથી

મનથી યે

ઉઠાય એવું નથી!

સારું છે, માત્ર સાંભળ્યું જ છે.....

પણ

મારી સીમને ભરી દેતી

ગુપત ગોઠે સદાયે મર્મ’રતી

પેલી હલેતી

તાડની જોડીનું શું થયું હશે?

આમલા-મલી પીપળા-પીપળી અને

વડની ઘટાળી છાયામાં ઊગેલા

પેલા મંદિરને–

એ સૌએ છેલ્લે શું કહ્યું હશે?

રોજ સવારે

કોઈ હિલ્લોળતી ડાળીએથી

ઘરને મોભેથી

નીચે ઊતરી આવતાં

પેલાં પંખી-પારેવાંનો

ચણતો કલબલાટ

પાછો ક્યાં જઈ ને

રાત્રે લપાઈ જશે?

સાંભળ્યું છે,

મારા ગામનાં કેટલાં ય જણ.....!

સાંજને પ્હોરે નદીએ પાણી પીને

પાછાં વળતાં

રૂમઝૂમતાં ગોધણ.....!!

સાંભળ્યું છે

મારા ગામને

મારી નદીએ

ઘુમરાતાં ચકરાતાં

ભભરાતાં વકરાતાં વમળોમાં.....

સાંભળ્યું છે

મારા ગામને

મારી નદીએ.....

સ્રોત

  • પુસ્તક : પૂર્વા (પૃષ્ઠ ક્રમાંક 55)
  • સર્જક : રમેશ જાની
  • પ્રકાશક : અક્ષરા (મુંબઈ) પ્રકાશન
  • વર્ષ : 1984