તમે

હર્ષદ દવે

તમે

હર્ષદ દવે

બહુ સંવેદનશીલ છો

રાતરાણીની ગંધથી તંદ્રાવસ્થામાં સરી પડો છો

કેળાની છાલ પર સરકતી જિંદગી જોઈને

આંખે અંધારા આવે છે

રસ્તા પરના ટ્રાફિકમાં ગુસ્સો કાબૂમાં રહેતો નથી

કમ્પ્યૂટરના સ્ક્રીન પર આખું વિશ્વ ફરી વળો છો

હૃદયના ધબકારા વધી જાય

આંખો ગૂમ થઈ જાય

શરીરથી અલિપ્ત હાથ-પગ

મગજ થીજી જાય

મન પરોવાય મોતીમાં

પણ વિચારો મોતી બની શકતા નથી

બહુ વિચારશીલ છો

એટલે વાગોળ્યા કરો છો

છાપાં, પુસ્તકો, પ્રવચનો, પ્રદૂષણો

સાથે જાસૂદનો રંગ

પતંગિયાનું ઉડ્ડયન

મોસંબીની મીઠાશ.

તમારી કોમળ ત્વચા પર

ફોલ્લીઓ ફૂટી નીકળતી નથી

એ આશ્ચર્યજનક છે

તમે ખુદ મોતી છો

તમે તો તમે જ છો

સ્રોત

પુસ્તક : પરિભ્રમણ (પૃષ્ઠ ક્રમાંક 36)
સર્જક : હર્ષદ દવે
પ્રકાશક : હર્ષદ દવે
વર્ષ : 2021