ચોમાસું ઉર્ફે ચાબુક

ચોમાસું ઉર્ફે ચાબુક

ચોમાસુ ચાબુક સબોડે સટાક ચાબુક સટાક ચાબુક સટાક

રેંજીપેંજી જીવ ન ઝીલે ઝીંક, પડે જીવલેણ ઝાટકે ઝટાક

આડેધડ આ સૉળ ઉપરવટ સોયઝાટકી સૉળ પડે ત્યાં કોણ મોખરે ઝૂઝે?

એકાદા અવયવની વાત જ ક્યાં છે? આ તો પાંચ હાથનું જણ આખુંયે દૂઝે

કોરાં લૂગડાંમાં ભાંગેલું એકલદોકલ કૈંક છુપાવી નીકળી કોઈ છત્રી ભોળીભટાક

છાંટા સાથે, વાછંટ સાથે, રેલા સાથે રેલો રેલો વહી નીકળતું ગામ

ખોબામાં સરનામું લઈને સાંકડમૂંકડ ભીંતો કોરી ઊભી છે શું કામ?

જુલમ સહીએ એમાં શાનાં છાનગપતિયાં? સહીએ મૂકી ડેલી, મૂકી છાતી, ખુલ્લીફટાક

Chomasu Urfe Chabuk