નર્મદા શું ગાઉં શોભા સાંજની;

હાંરે પવન પાણી વાદળ રંગના સુસાજની - હોજીરે. ન...

હાંરે પાણી જોરમાં ઉછાળા નોતું મારતું;

હાંરે પહોળા પટ્ટથી દેખાતી પ્રૌઢ નાર તું - હોજીરે. ન...

હાંરે વીળ ખળખળી ધીમે ચઢીને આવતી;

હાંરે તે તો હોડીમાંથી જોઈ સુણી ભાવથી - હોજીરે. ન...

હાંરે ડહોળાયેલ નીર રંગ તે ભૂરો હતો;

હારે ઝાંખો શ્વેત આસમાન તણો દીસતો – હોજીરે. ન...

હાંરે પાકા રંગના ભૂરા તે સામે ડુંગરા;

હાંરે ગળી રંગનાં ટોચે તો ભૂરાં વાદળાં - હોજીરે. ન...

હાંરે કાંઠે ઘાસ લીલાં ઝાડ બહુ શોભતાં;

હાંરે ચાર ગાય ભેંસ ઢોર ખાતાં હતાં - હોજીરે. ન...

હાંરે આવે મંદ મંદ વાયુ ખુશ લાગતો;

હાંરે હોડી ચાલતી તેને ઘણો સવા હતો - હોજીરે. ન...

હાંરે એક વાછડી કાંઠે મથતી ઘણી;

હાંરે પડી જાતી તે ઊંચે જતાં જીની ભણી - હોજીરે. ન...

હાંરે ગુલાબી ઘેરો તે રંગ આસમાનનો;

હાંરે ગુલાબી ફૂલોનો પાણીનો મેદાનનો - હોજીરે. ન...

હાંરે સુદી તીજનો ઊગેલ ચંદ્ર તે સમે;

હાંરે લહેરિયાંની રમ્ય લહેર માંહી મન રમે - હોજીરે. ન...

હાંરે પવન સામટો પડી ગયો પછી ખરે;

હાંરે લીલા બ્રહ્મની જોઈ શી આંખો ઠરે! - હોજીરે. ન...