વિશ્રમ્ભવૃત્ત!

વિશ્રમ્ભવૃત્ત!

ફરી વળી ખૂણેખૂણો, ક્યાં ખોવાયું? ક્યાં મૂક્યું?

સહિયર! મારી નાસિકાનું આભૂષણ ક્યાં તૂટ્યું?

હું અલબેલી કાલ સવારે નદીએ ન્હાવા ગઈ’તી,

હો કોયલ-ટહુકે વનરાજીના ઝાડ-પાન શી થઈ’તી,

હું નંદી પર ઝૂકી’તી

ઘંટારવ કરવા કૂદી’તી

પકડી વડવાઈ ઝૂલી’તી

નમન-અચમન, કુંક વેળા દર્પણમાં મરકી’તી;

હોઠ ઉપર મોતી જોયુંતોં ઝૂક્યું!

સહિયર! મારી નાસિકાનું આભૂષણ ક્યાં તૂટ્યું?

હતી સાંજના મગ્ન, પિયુએ આંખ દબાવી દીધી,

મેં પણ ભળતાં નામ કહી, એ પણ લંબાવી લીધી.

હું અનરાધારે વરસી’તી

મૂશળધારે પલળી’તી

વમળે નૌકા શી તરતી’તી

પલક ઝપકતાં પરોઢ વેળા પાંપણમાં સરકી’તી;

અડવા મુખે પ્રભાત ઊગ્યું!

સહિયર મારી નાસિકાનું આભૂષણ ક્યાં તૂટ્યું?

ફરી વળી ખૂણેખૂણો, ક્યાં ખોવાયું ક્યાં મૂક્યું?

સહિયર! મારી નાસિકાનું આભૂષણ ક્યાં તૂટ્યું?

wishrambhwritt!