કોઈની સાથે નથી હરીફાઈમાં

કોઈની સાથે નથી હરીફાઈમાં,

એ રહે છે એટલે સરસાઈમાં.

જીવવાનું રોજ ભલમનસાઈમાં!?

એય પાછું આટલી મોંઘાઈમાં?!

ચોરીને લાવ્યા તમે એને ભલે,

સૂર ક્યાંથી લાવશો શરણાઈમાં?!

એમની આકાશ સુધી પહોંચ છે,

એ ભલે ટૂંકો રહ્યો લંબાઈમાં!

કોઈ પીંછું ઊડતું આવી ચડે,

એય ગમતું હોય છે તન્હાઈમાં.

થાય ક્યાંથી એને દર્શન ટોચના,

જે કદી ઊતર્યા ન હો ગહેરાઈમાં.

એમ કોઈ ક્યાં પૂરે છે કીડિયારું

જીવ ખુદનો હોય કીડીબાઈમાં!

કોઈ મારા શત્રુ કાં બનતા નથી?

કંઈક તો ખામી હશે સચ્ચાઈમાં.

એવી રીતે એમણે પડતું મૂક્યું,

જાણે કંઈ ભાળી ગયો હો ખાઈમાં!

koini sathe nathi harifaimaa