સ્પર્શના અહેસાસથી રંગુ તને

સ્પર્શના અહેસાસથી રંગુ તને

મહેકતા ઉચ્છવાસથી રંગુ તને

હુંય રંગાઈ ગયો ગુલમો'ર સમ

ને હવે મધુમાસથી રંગુ તને

આ બધાય રંગ તો ફટકી જશે

રક્તના અજવાસથી રંગુ તને

તું ગઝલના શે'ર થઈને આવે તો

પ્રાસ ને અનુપ્રાસથી રંગુ તને

ચૈત્રના દિવસોના છે સોગંદ તને

આવ ભીની પ્યાસથી રંગુ તને

આમ હેરતથી મને જોયા ન કર

રાખે તો વિશ્વાસથી રંગુ તને

મીણની માફક હું પીગળું છું હનીફ

આવ છેલ્લા શ્વાસથી રંગુ તને

Sparshna Ehsas thi Rangu Tane