રેખ્તા
હિન્દવી
સૂફીનામા
રાજસ્થાની
આસિમ રાંદેરી
એક ભ્રમણા છે, હકીકતમાં સહારો તો નથી,
જેને સમજો છો કિનારો એ કિનારો તો નથી.
એક પણ ફૂલમાં અણસાર તમારો તો નથી,
ભાસ કેવળ છે બહારોનો બહારો તો નથી.
એ ખજાનો છે ગગન કેરો, અમારો તો નથી,
એક પણ એમાં મુકદ્દરનો સિતારો તો નથી.
કેમ અચરજથી જગત તાકી રહ્યું મારું વદન?
સ્હેજ જોજો, કોઈ પડછાયો તમારો તો નથી.
દિલના અંધકારમાં, આ ચાંદની ક્યાંથી ખીલી?
ચંદ્રમુખ! એ મહીં ઓછાયો તમારો તો નથી?
મુજને દુનિયાય હવે તારો દીવાનો કે' છે,
એને સંમત તારી આંખોનો ઇશારો તો નથી?
મુજને મઝધાર, ઓ મોજાંઓ ફરી લઈ ચાલો,
મારો હેતુ, મારી મંઝિલ આ કિનારો તો નથી!
હુંય માનું છું નથી ક્યાંય 'એ' દુનિયામાં નથી,
પણ વિચારો તો બધે છે ન વિચારો તો નથી!
માત્ર મિત્રોનું નહિ, દુનિયાનું દરદ છે એમાં,
કોઈનો મારી મોહબ્બતમાં ઇજારો તો નથી!
પ્રેમ-પત્રો એ હરીફોના ભલે વાંચો; તમે,
એમાં જોજો મારી ગઝલોનો ઉતારો તો નથી?
લાખ આકર્ષણો મુંબઈમાં ભલે હો 'આસિમ!'
મારી 'લીલા', મારી ‘તાપી'નો કિનારો તો નથી.
સ્રોત
- પુસ્તક : આસિમ રાંદેરીની ચૂંટેલી ગઝલો : લીલાયન (પૃષ્ઠ ક્રમાંક 27)
- સંપાદક : હરજીવન દાફડા
- પ્રકાશક : ગુજરાત સાહિત્ય અકાદમી
- વર્ષ : 2022