રામદેવના વેશમાંથી

પહેલો પહોર મારે દિવસનો

પિયુ મારા મૃગયા ન જાઓ,

આંગણ ખોદાવું કુવેલડો

પછે હું નાખું નેણાય.

બીજો પહોર મારે દિવસનો

પર વાડીએ રમવા ન જાઓ,

આંગણ વાવું દ્રાક્ષ બિજોરડી

આવી હું વીણું તમે ખાઓ.

ત્રીજો પહોર મારે દિવસનો

પરઘેર રમવા ન જાઓ,

છાની કરું બાજોઠડી ને

સોગટાં, હું પાસા તમે દાવ.

ચોથો પહોર મારે દિવસનો

સુખડિયા હાટ ન જાઓ,

આપું બબ્બે લાડુઆ

તમે બબ્બે હાથે ખાઓ.

પાંચમો પહોર મારે રેનનો

દીવડિયાં ઝાકમઝોળ,

હું છું કાંટાળી રે કેવડી

મારો પિયુ કંકુની રોળ.

છઠ્ઠો તે પહોર મારે રેનનો

વળી મળિયાં ગુંજે ગુંજ,

હું છું આસમાની વીજળી

મારો પિયુ આષાઢો ઘન.

સાતમો તે પહોર મારે રેનનો

હૈડે વરસે નેહ જી,

પિયુ પાંખડિયો હું છોડલી

મારે નેણે વરસે મેહજી.

આઠમો પહોર મારે રેનનો

કૂકડિયાં કરે કલોલ,

હું સમારું મારી મેખલા

મારો પિયો સમારે મોળજી.

પુસ્તક : ગુજરાતી લોકસાહિત્યમાળા – મણકો–1 (પૃષ્ઠ ક્રમાંક 324)
સંપાદક : ગુજરાત લોકસાહિત્ય સમિતિ (ઉમાશંકર જોશી, પુષ્કર ચંદરવાકર, સુધા દેસાઇ, મંજુલાલ ર. મજમૂદાર, મધુભાઈ પટેલ, લાલચંદ ધૂળાભાઈ નીનામા. સુધા રમણલાલ દેસાઇ
પ્રકાશક : ગુજરાત લોકસાહિત્ય સમિતિ, અમદાવાદ
વર્ષ : 1957

ramdewna weshmanthi