સ્વામી મોરાં ચોખા મંગાવો

સ્વામી મોરાં, ચોખા મંગાવોને કંકુડે અજવાળો રે,

ધનરા વીરને તેડાવીએ.

સ્વામી મારા, સાસુજી આવ્યાને, સસરાજી આવશે રે,

મારા મૈયરનું કોઈ ન આવિયું.

ગોરી તમારા મૈયરની વાટે ડુંગરા ઘણેરા રે,

તે માટે કોઈ ન આવિયું રે.

સ્વામી મોરા, સલાટ તેડાવો, ડુંગરા કોરાવો રે,

ધનરા વીરને તેડાવીએ.

સ્વામી મોરા, જેઠાણી આવ્યાને જેઠજી આવશે રે,

મારા મૈયરનું કોઈ ન આવિયું રે.

ગોરી તમારા મૈયરની વાટે સાગર ઘણેરા રે,

તે માટે કોઈ ન આવિયું રે.

સ્વામી મોરા હાથીડા મંગાવીને સાગર શોષાવો રે,

ધનરા વીરને તેડાવીએ.

સ્વામી મોરા, દેરાણી આવ્યાંને દેરજી આવશે રે,

મારા મૈયરનું કોઈ ન આવિયું રે.

ગોરી તમારા મૈયરની વાટે વેરી ઘણેરા રે,

તે માટે કોઈ ન આવિયું રે.

સ્વામી મોરા, વેરી મનાવો ને મોળિયાં બંધાવો રે,

મામેરથ વીરને તેડાવીએ.

swami moran chokha mangawo