મૂરખો રળી રળી કમાણો રે

મૂરખો રળી રળી કમાણો રે, માથે મેલશે મોટો પહાણો.

ધાઈ ધૂતીને ધન ભેળું કીધું, કોટીધ્વજ કહેવાણો;

પુણ્યને નામે પા જૈં ન વાવર્યો, અધવચથી લૂંટાણો રે.

ભર્યા કોઠાર તારા ધર્યા રહેશે, નહિ આવે સાથે એક દાણો;

મસાણની રાખમાં રોળાઈ ગયા કંઈક, કોણ રંકને કોણ રાણો રે.

મંદિર માળિયાં મેલી કરીને, નીચે જઈ ઠેરાણો;

ભોજો ભગત કહે મૂઆ પૂઠે જીવ, ઘણો ઘણો પસ્તાણો રે.

Murkho Rali Rali Kamano Re