તને અધિક શેં ન ચાહું

તને અધિક શેં ન ચાહું, અવ દૂર છોને રહ્યાં.

અરાગ તુજથી થયો, તુજથી ઝેર આંખો તણાં

ગયાં, નયન વિશ્વનું, નિગૂઢ તુંથી શોધી શક્યાં.

પીધો કરુણ જીવને, જીવન-મૃત્યુનાં દ્વંદ્વનાં

રસાયન પીધાં, હવે નહિ મને કશા ઑરતા.

વ્યથા પ્રણયની સહી, પ્રણયમાં ધૃતિયે લીધી

અને ઉભયના ઉરે પ્રણય મૂક માણી લીધો.

જવાબ નહિ માગવો, નયનમાં જ વાંચી લીધો.

જૂઠી નયનની લિપિ કદીય કોઈ ક્હેશો નહિ —

અશબ્દ શિશુ માતૃસ્નેહ નયને જ વાંચી લિયે,

તથા ચ પ્રણયી અને સ્વજન સ્નેહીઓયે સુણે

કથા હૃદયની બધી નયન વૈખરીમાં શુભે!

સુદૂર રહી પીયૂષો પ્રણયનાં તું વર્ષાવજે

અને જીવનમાં સદાય શુચિ ભાવથી પ્રેરજે.

tane adhik shen na chahun